അമ്മാവന്റെ തല വെട്ടിയെടുത്തു, കൂടോത്രം ചെയ്‌തെന്നു സംശയം, രണ്ടു കിലോമീറ്റര്‍ റോഡിലൂടെ നടന്നു; അറസ്റ്റ്
സിദ്ധി (മധ്യപ്രദേശ്):അമ്മാവൻ കൂടോത്രം നടത്തിയെന്ന സംശയത്തില്‍ യുവാവ് തലവെട്ടി കൊലപ്പെടുത്തി.
ഒരു കൈയില്‍ വെട്ടിയെടുത്ത തലയും മറുകൈയില്‍ മഴുവുമായി രണ്ടു കിലോമീറ്റര്‍ റോഡിലൂടെ നടന്ന യുവാവ് പ്രദേശത്ത് ഭീകരാന്തരീക്ഷം സൃഷ്ടിച്ചു. ഇയാളെ പിന്നീട് പോലീസ് അറസ്റ്റ് ചെയ്തു.
സിദ്ധി ജില്ലാ ആസ്ഥാനത്തിന് പത്തു കിലോമീറ്റര്‍ മാത്രം അകലെ ജമോദി പൊലീസ് സ്റ്റേഷന്‍ പരിധിയിലാണ് ഈ നടുക്കുന്ന സംഭവം. അമ്മാവന്‍ കൂടോത്രം ചെയ്തു എന്നും, തനിക്കു നിരന്തരം പ്രശ്‌നങ്ങള്‍ ഉണ്ടാക്കുന്നെന്ന സംശയത്തില്‍ 26കാരനായ ലാല്‍ ബഹാദൂര്‍ ഗൗഡ് അദ്ദേഹത്തെ ആക്രമിക്കുകയായിരുന്നു.
വെള്ളിയാഴ്ച അമ്മാവന്‍ മക്‌സുദന്‍ സിങ് ഗൗഡിന്റെ വീട്ടില്‍ എത്തിയ ലാല്‍ ബഹാദൂര്‍ കൂടോത്രത്തിന്റെ കാര്യം ചോദിച്ചു. ഇതിനെച്ചൊല്ലി ഇരുവരും തമ്മില്‍ വഴക്കും വാക്കേറ്റവുമായി. തുടര്‍ന്ന് ലാല്‍ ബഹാദൂര്‍ മഴുകൊണ്ട് അമ്മാവന്റെ കഴുത്തില്‍ ശക്തിയായി വെട്ടുകയായിരുന്നു.
വെട്ടിന്റെ ശക്തിയില്‍ അമ്മാവന്റെ തല വേര്‍പെട്ടു. ഒരു കൈയില്‍ തലയും മറു കൈയില്‍ മഴുവുമായി നടു റോഡിലൂടെ രണ്ടു കിലോമീറ്ററോളം നടന്ന ശേഷമാണ് പൊലീസ് സ്റ്റേഷനിലെത്തി ലാൽ ബഹാദൂർ കീഴടങ്ങിയത്.
